Hai aproximadamente un século afirmaba Ortega e Gasset que non vivimos coa tecnoloxía, senón que o facemos dentro dela. Esta aseveración tórnase máis real hoxe en día, onde o termo «sociedade da información» reflicte o protagonismo que as tecnoloxías da información e a comunicación (TIC) teñen no mundo actual en todos os ámbitos, xa sexa sociais, económicos, políticos ou culturais.

A acumulación de información prodúcese de modo masivo; a relativa ás persoas é a máis apreciada e valorada, debido ao poder que confire a quen a posúe. Existen riscos, como os resultantes da manipulación e interrelación de datos illados ata obter auténticos perfís de personalidade dos individuos.

É polo tanto necesaria a defensa do individuo e do seu dereito fundamental á protección dos seus datos persoais, recollido na propia Constitución española, e entendida como a súa facultade para decidir cando e baixo que límites debe revelar datos acerca da súa persoa.

Por outra parte, a evolución da normativa relacionada coas novas tecnoloxías a miúdo non é capaz de dar alcance á potencialidade dos novos servizos proporcionados pola Rede. Froito desta evolución normativa xorde en España a Lei Orgánica de Protección de Datos (LOPD), a través da cal se confiren unha serie de dereitos aos usuarios á hora de ceder os seus datos e con posterioridade á propia cesión.

Estamos nun momento de auténtica revolución tecnolóxica, organizativa e empresarial, con especial repercusión nas relacións comerciais e a decidida aposta das institucións públicas pola e-Administración. É preciso crear e transmitir confianza aos usuarios para que cedan os seus datos de carácter persoal e que estes vaian seguros e protexidos polas redes de ordenadores. O éxito do verdadeiro despregamento do comercio electrónico e as relacións informáticas coa Administración dependerán da seguridade ofrecida para que os cidadáns as utilicen, ademais tendo que terse unha clara percepción da devandita seguridade.

Por todo o expresado, resulta fundamental o labor de difusión e pedagóxico en todos os estratos sociais. Froito desta necesidade nacen iniciativas como a do Consello de Europa e a Comisión Europea celebrando no día de hoxe o día europeo de protección de datos, cuxo principal obxectivo é impulsar o coñecemento entre a cidadanía dos dereitos e deberes nesta materia.

No novo contexto tecnolóxico, a Enxeñaría en Informática toma cada vez máis relevancia tanto á hora de estender o coñecemento da lexislación asociada (protección de datos, propiedade intelectual, comercio electrónico, etcétera) a usuarios e profesionais, como na implantación e desenvolvemento dos novos sistemas e tecnoloxías da información. A crecente complexidade destes fai necesario apoiarse na utilización de ferramentas, normativas e unha metodoloxía de traballo para poder abordar de modo continuo a auditoría das medidas establecidas pola LOPD. É aí onde os enxeñeiros en Informática teremos un papel protagonista nos próximos anos.