Ao abeiro do dito acordo, as dúas entidades buscarán como obxectivo xeral promover a Enxeñaría en Informática mediante un maior prestixio e achegamento social.

O documento subscrito hoxe na cidade da Coruña recoñece a necesidade de achegar o contorno educativo á realidade profesional e social. Asemade, o texto destaca a necesidade de "progresar no ordenamento do ámbito da Informática".

Entre outros propósitos, o acordo de colaboración rubricado polos máximos representantes do CPEIG e a UDC destaca a realización de actividades e proxectos de forma conxunta. Así, figura o propósito de favorecer a participación en proxectos e programas de investigación e desenvolvemento bilaterais ou multilaterais; a cooperación en programas de formación; o asesoramento mutuo en cuestións relacionadas coa actividade das dúas entidades; a organización e realización de todo tipo de actividades académicas, como poden ser cursos, conferencias, simposios, seminarios ou clases; o intercambio e colaboración en do tipo de proxectos culturais de interese común e a realización de todas aqueloutras actividades que se considere de interese mutuo.