Durante a mañá de hoxe celebrouse unha renunión ao máis alto nivel ministerial en Madrid cos representantes dos colexios profesionais das enxeñarías en informática, na cal se produciron importantes avances na problemática das enxeñarías en informática.

Entre estes avances é posible destacar o compromiso do goberno en resolver durante este mes de xaneiro a regulación das fichas das titulacións, situándoas ao mesmo nivel que as restantes enxeñarías.

En relación coas atribucións profesionais, durante a anterior reunión, o goberno comprometeuse firmemente na creación dunha mesa de traballo na que participarán os ministerios implicados, os colexios profesionais das enxeñarías en informática e a Conferencia de Decanos e Directores de Informática, coa finalidade resolver a situación de discriminación que sufre a nosa profesión no eidodas atribucións profesionais.

Así mesmo, o Presidente do CPEIG, Fernando Suárez, mantivo esta mañá unha conversación telefónica co Director do Departamento de Asuntos Institucionais do Gabinete da Presidencia do Goberno, Gabriel Maganto. Nesta conversación o representante do goberno transmitiulle ao Presidente do CPEIG que o Presidente do Goberno, José Luis Rodríguez Zapatero, é plenamente consciente da problemática das enxeñarías en informática e que está redisposto a aportar solucións coa maior brevidade posible.

Dados estes avances significativos e concretos, o CPEIG entende que nestes momentos existe un clima de diálogo razoable para resolver a problemática da nosa profesión.

Por todos estes motivos, o CPEIG e CPETIG desconvocan o acto de concentración do vindeiro domingo 11 en Ourense, sen prexuízo de que se os compromisos adquirdos non se plasman nos tempos acordados se retomen as movilizacións novamente durante os periodos electorales dos vindeiros meses.