INTECO colaborou co comité para a creación do consello de colexios de enxeñaría en informática (CCII) nun estudio sobre o uso de etodoloxías e ferramentas no desenvolvemento do software.

A segunda vaga do estudo de INTECO, sobre a incidencia e confianza dos usuarios de Internet, toma como base a medición mensual da frecuencia dos episodios de risco individual nunha mostra ampla de máis de 3.000 fogares panelizados on-line. Esta segunda vaga do estudo corresponde aos meses de xaneiro a abril de 2007 e permite, por primeira vez, unha comparanza evolutiva da situación de seguridade, confianza e nivel de incidencias de seguridade dos fogares usuarios de Internet do conxunto do Estado. Mostra os hábitos que afectan á seguridade en Internet: o equipamento de seguridade nos fogares, as medidas que os usuarios toman antes e despois das incidencias e a percepción relativa á seguridade en Internet que hai nos fogares de todo o Estado.

Hábitos de uso de Internet

• Medra, respecto de xaneiro, a frecuencia de uso de Internet desde o fogar: o 26,1% dos usuarios dedícanlle máis de 20 horas semanais a Internet desde o fogar.
• Os servizos de Internet máis utilizados polos usuarios de Internet desde o fogar, son o correo electrónico (99,3%) e a procura de información (79,8%).
• Aumenta o uso dos foros en liña un 7,6%, e dos pagos por Internet un 13,5%, e diminúe a procura de información a través de Internet nun 6,9%.
• Mantense constante o perfil de servizos de Internet administrados, sendo os servizos administrados por un maior número de usuarios, as páxinas Web (17,9%) e o blog (14,9%).
• O 49,7% dos usuarios desatenden o ordenador mentres descargan arquivos.

Medidas e hábitos de seguridade en Internet

• O 93,3% dos fogares conectados a Internet de forma habitual, en abril de 2007, sinalan que dispoñen de programa antivirus. A análise dos seus equipos mostra que, do mesmo xeito que en xaneiro, un 9% destes equipos realmente non conta con antivirus.
• Medra o uso de devasa ou firewall, así como de programas de bloqueo de fiestras emerxentes e as previsións chegan a niveis do 75% de penetración para xullo de 2007.
• As medidas que esixen un comportamento máis activo do usuario seguen sendo as menos frecuentes: só un 32% dos usuarios fan copias de seguridade dos seus arquivos e, aínda que se aprecia certo crecemento, este é moi miúdo.
• As principais razóns para non incorporar as medidas de seguridade continúan sendo a percepción de que a medida é innecesaria e o descoñecemento do seu funcionamento.

Percepción de seguridade en Internet

• A percepción de seguridade persoal durante a navegación e uso de Internet segue a ser alta, sobre todo en canto á protección do propio ordenador fronte a ameazas (81,9%).
• A incidencia de seguridade máis frecuente declarada polos usuarios, é a recepción de correo non desexado (spam), que se mantén próxima ao 80% nos últimos tres meses.
• En xeral os usuarios están convencidos de que dispoñen da protección suficiente para realizar unha navegación segura. Este feito aséntase, principalmente, no feito de ter instalado un programa antivirus, deixando case exclusivamente a este, a xestión de seguridade do equipo. Por iso é polo que a reacción máis común, tras unha incidencia de seguridade, segue sendo actualizar ou cambiar de antivirus (60,6%).
• A gravidade das incidencias declaradas tamén é algo maior. Un 43,5% declara que tivo que formatear o disco duro no último ano como consecuencia dunha incidencia de seguridade, respecto ao 41,9% que o declararan en xaneiro.
• As incidencias de seguridade afectan pouco ao abandono ou cambio de servizos en liña. Detéctase un aumento do cambio de contas de correo electrónico por motivos de incidencias de seguridade (14,2%).
• Tras sufrir unha incidencia os usuarios din volverse máis cautelosos (45,2%) e demandar máis información (45,6%), pero non se volven máis solidarios informando a outros usuarios dos perigos (18,8%).
• Como na primeira vaga, case o 9% dos usuarios caracterízase por prácticas imprudentes ou temerarias que comportan risco para o propio sistema e para o resto de usuarios, non por iso modificando os seus hábitos imprudentes.

Situación real de seguridade dos equipos nos fogares

• A presenza de códigos maliciosos mantense en niveis similares desde xaneiro: case 8 de cada 10 equipos mantén un ou máis códigos maliciosos (malware) no ordenador doméstico con acceso a Internet. En concreto, o 77,1% dos ordenadores analizados en abril presentan algún tipo de código malicioso.
• A tendencia actual, centrada na produción de códigos maliciosos cun obxectivo netamente lucrativo, é a base da xeración de códigos maliciosos de risco alto, na súa maioría troianos que están presentes no 54,3% dos ordenadores, cando en xaneiro achábanse no 51,1% dos equipos. Os virus presentan un descenso continuado desde o 11,9% de xaneiro ao 9,3% en abril.
• Existe un aumento na proliferación e diversificación de variantes de códigos maliciosos, especialmente de troianos, de 48,7% a 49,9% do total de variantes, o que dificulta os labores de detección e solución do malware.
• A Enxeñería Social sitúase como o vector de ataque máis utilizado para conseguir o aumento de incidencias, sen necesidade de recorrer á infección automática aproveitando as vulnerabilidades dos sistemas.

Evolución dos Indicadores de Seguridade

• A situación global de seguridade segundo o sistema de indicadores, mostra unha mellora na protección do equipamento individual (maior valor do indicador de equipamento en seguridade, que pasa de de 61,0 a 63,9 puntos), e unha menor prudencia na navegación entre os meses de xaneiro e abril de 2007 (crecemento do indicador de conduta temeraria de 19,3 a 23,0 puntos).

Das variables de segmentación do sistema de indicadores, os hábitos de uso e a idade son as que mostran características máis diferenciadas:

• Os usuarios imprudentes controlaron o seu risco, aumentando o seu equipamiento en seguridade. Con iso prodúcese unha redución relativa da presenza de códigos maliciosos nos seus ordenadores, pero seguen existindo un gran número de ordenadores con capacidade de diseminar ameazas na Rede.
• A idade se perfila como un factor significativo dos hábitos de uso. As persoas de maior idade mostran un comportamento máis seguro e uns hábitos máis previsores, os menores de 25 anos presentan comportamentos máis temerarios.
• En xeral, parece abrirse paso unha cultura da seguridade centrada en instalar e esquecerse, que ofrece unha confortable sensación de seguridade á vez que relaxa a necesaria atención permanente durante a navegación.